Ze Žylowa/Sielow. Njepśedstajone, ale napšawdu realita. Njeźelu, 6. awgusta, jo se młody manźelski pórik ze Žylowa na njewšednu kólasowaŕsku turu pódał. Start jo se wótměł na sportnišću SV Motor Saspow, źož jo Justin Wenzke aktiwny balokopaŕ. Jogo teamowe kolegi su za njogo a jogo manźelsku Anni Wenzkowu na dešćowej njeźeli pśidatnu „dešćowu drastwu“ baslili, nježli stej na něźi 20.000 kilometrow startowałej. Stej njeźelu nejpjerwjej raz do wokoliny Złego Komorowa dojěłej, źož stej nejpjerwjej raz stan natwariłej. Pótom źo do Pragi, pótom na Balkana, do Turkojskeje, do Armeńskeje, Irana a Emiratow, nježli jich droga do Indiskeje a Nepala wjeźo. K zakóńcenju tury drogujotej prěki pśez Ameriku, źož maju za něźi šesć tyźenjow USA wót Kaliforniskeje až do Floridy pśeprěkowaś. W decembrje pśiducego lěta cotej wónej pó dokóńcenju swójeje mamutoweje tury zasej doma pód gódownym bomom sejźeś.