Z Jarješka/Jerischke. Lětosny Witaj-camp jo se wótměł na zwuconem městnje – w nakrajnem šulskem domje we wótlažanem Jarješku. Z lěgwa móžoš wiźeś gólu, małučku wjasku, póla a winicu na górce. Do teje idyle jo se wupórało w prědnem prozninskem tyźenju źewjeśo źowćow a 22 gólcow, to groni 31 wobźělnicow a wobźělnikow w starstwje wót 8 až do 14 lět. Wóni su pśišli ze wšakich městnow a šulow, tenraz wšykne z wokrejsa Sprjewja-Nysa a z Města. Tu radnu licbu su wobstarali Aleksander Draguła a Maks Bagańc z Rěcnego centruma WITAJ a Isabelle Grätz-ojc, kótaraž jo wuchójźiła łoni Dolnoserbski gymnazium. Ten team jo měł južo drugi raz Witaj-camp na starosći a jo jen wuspěšnje, ako wuchada z wugódnośenja wobźělnikow, zmejstrował. Zaměr Witaj-campa jo, aby źiśi a młodostne, kótarež serbsku rěc w šuli wuknu, móžnosć měli, ju raz zwenka šule a teke z drugimi luźimi nałožowaś. Tak su se wšedne informacije a rozpokazowanja zasadnje w serbskej rěcy pósrědnili. Mimo prezence serbskeje rěcy w situacijach wšednego dnja jo dało zaběry, kótarež su byli eksplicitnje wusměrjone na nałožowanje rěcy.