Z Města/Cottbus. Wót zachadnego stwórtka wustaja Serbski dom kopicu wobrazow wó serbskich stawiznach Drjenowa. Wustajeńcu pśi aktiwnej pódpěrje Dolnoserbskego seksteta a Marije Elikowskeje- Winkleroweje stej pśigótowałej Drjenowaŕce Johanna Pontowa a jeje źowka Doris Klinke-Schulze. Ta iniciatiwna kupka jo zapśěgnuła wjele wejsanarjow.

Decernent wokrejsa Sprjewja-Nysa a zastupny krajny raźc Michael Koch, iniciatiwne wejsanarje Fryco Kašamaŕ, Brigita Adamowa, Helga Langowa, Lenka Schröterowa (Muchojc) a wjele drugich z Města, Drjenowa a Liškowa su byli pódla, dogromady někak połsta luźi su pśišli a mjazy sobu su teke zdźěla serbski powědali. Wótwórił wustajeńcu jo Dolnoserbski sekstet (Anja Donatojc a Jana Winklerojc). Sobuźěłaśeŕka Lodki Sandra Mählojc jo wuwitała gósći z póstrownym nagronom, dalšne słowa su měli pśedsedaŕ towaristwa Dolnoserbski sekstet Karl Fisher a Marja Elikowska-Winklerowa.