Z Drjowka/Drebkau. Wót njeźele, 16. julija, do 1. oktobra, pśedst-ajijo a rozkładujo muzej Serbska tkajaŕska śpa Drjowk w ramiku swójeje lěśojskeje wósebneje wustajeńce serbske nałogi z Dolneje Łužyce. Serbske nałogi su hyšći źinsa wažny źěl wejsneje kultury we Łužycy, a su zakład identity – wósebnje tam, źož jo se serbska rěc južo pśed dłujkim casom zgubiła. Spócetk toś tych nałogow se namakajo cesto w pśedkśesćijańskem tataństwje, a tak deje wóne demony wugóniś, nalěto wuwitaś a cłowjekam a zwěrjetam strowotu a gluku pśinjasć. Wjednica muzeja, Doreen Haiaschowa, jo wustajeńcu tak natwariła, až woglědaŕ móžo se na drogu daś pó cełem lěśe, wót camprowanja do źiśetka. Źaseś informaciskich toflow wopisujo gósćam slězynu, wóznam a wótběg nałogow a wšake eksponaty, ako cepy, jatšowne jaja abo drastwowe źěle pomagaju nałogi „dožywiś“. Mjazy drugim wudopołniju wustajeńcu wupóžyconka wót Tradiciskego towaristwa Kózle, rozmjej tamnjejše drastwowe kóšule, sam zgótowane maski k ptaškowej swajźbje a dalšne objekty.