Z Města/Cottbus. Južo pěś lět źěła Šula za dolnoserbsku rěc a kulturu w ramiku swójogo kompaktnego kursa z Serbskim muzejom zgromadnje, a tak jo było Serbske blido zachadnu srjodu wósebnje pśedwiźone za kursistow. Wušej 20 woglědarjow, a to se wě, wětšy źěl z nich wobźělniki kompaktnego kursa, jo mógała kuratorka Christina Kliemowa na wjeźenje pó wustajeńcy „Wšo jo krajina“ z twóŕbami Jana Buka witaś. Wóna jo z pomocu jadnotliwych wobrazow we wustajeńcy Serbskego muzeja – drugi źěl jo we Wuměłskej hali Łužyca wustajony – rozkładowała jogo wuwiśe ako wuměłc, kótaryž jo se w běgu swójogo statkowanja wěcej pśiwobrośił abstraktnemu wuměłstwoju.