Z Grodka/Spremberg. Hyšći njestoje meble w nastajujucem serbskem kolektiwnem běrowje w Grodku, weto jo pak južo se wótměła prědna wuměna z wótpósłańcku Zwězkowego sejma Maja Wallsteinoweju (SPD). W ramiku jeje „pśisłuchańskeje tury“ jo wóna sobotu, 15. julija, za góźinku zastała a se informěrowała wó serbskich projektach strukturneje změny wót Łužycafilma a Łužyskego instituta. Rozgrono jo pśi tom se rozšyriło wót łužyskich keramikow až do tuchylnych filmowych projektow.

Zgromadnje su pśibytne pakśik keramikoweje designerki Judith Andersoweje wupakowali. Pakśik jo wobpśimjeł pilotowe zwopšawdnjenje łužyskego serwija, kótaryž jo wupyšnjony z pó modernej wašni aranžěrowanymi, tradicionelnymi serbskimi motiwami jatšownych jajow. Sudobja sami maju modernu formu. Pśibytne su keramiku z „rědnje a k wužywanjeju gódne“ pógódnośili. Zwopšawdnjenje w małej seriji by se dejało pódpěrowaś.