Z Města/Cottbus. Kupka študańcow BTU wuslěźijo w slědnych mjasecach wliw pśetwórjaneje łužyskeje krajiny na etno-kulturelne wuwiśe. Projekt jo iniciatiwa katedry powšyknych techniskich wědomnosćow (ATW) a Serbskego muzeja Chóśebuz. Góźba za to jo wustajeńca serbskego mólarja Jana Buka. Projekt prezentěrujo wjeliku licbu wuměłskich twóŕbow, kótarež njejsu jano znankstwa zachadnosći industrielneje krajiny, ale teke demonstrěruju wliw industrielnego socio-techniskego pśechada na wótmólowanych pśez wuměłcow krajinach.
Projekt nawjedujotej profesor dr. Astrid Schwarz, wjednica katedry ATW (Šwicaŕska/Nimska) a Anca Claudia Prodan asistentna profesorka pśi katedrje ATW (Rumuńska/Nimska). Wobźělniki su Himanshi Gohel, študentka studijow swětowego derbstwa (WHS) z Indiskeje, Yunjin Lee, študentka WHS z pódpołdnjoweje Koreje, Daria Solopova, študentka managementa wobswětowych resursow (ERM) z Rusojskeje, Gaelle Stephan, študent technologije, wědomnosći a towaristwa (TeSS) (Libanon) a Hok Nang Tam, študent WHS a TeSS z Hongkonga.