Ze Žylowa/Sielow. Lětosa, ku kóńcoju šulskego lěta, jo Witaj-hort Žylow zasej pśewjadł mini-playback-show. 33 źiśi wót prědneje do stwórteje rědownje jo swóje nejlubše spiwy starjejšym a rědowniskim kameradam prezentěrowało. Pśiglědarje su zaśišć dostali, ako by byli na pšawem koncerśe, dokulaž skobodne źiśi su tak derje wuměli teksty a gesty originalnych muzikarjow.
Skóńcnje jo kuždy dostał medalju za sobustatkowanje. Pśidatnje jo pak teke jury pósuźiła wugbaśe wobźělnikow a tak su nejlěpše źiśi sebje dobyśaŕske medalje zasłužyli. Lubuškoju publikuma Kwami jo ga se raźił swójo dobyśe ze zachadnego lěta wóspjetowaś. Wón jo luštny źaseślětny gólc, kenž jo pśed styri lětami ze swójeju familiju z kraja Ghana do Nimskeje śěgnuł. Kwami jo z Helenu a Danielu ako trio wustupował a jo se ze źowćoma za spiw „Wildberry Lillet“ repaŕki Nina Chuba rozsuźił. Až to jo ten pšawy rozsud był, jo teke publikum wobwěsćił – swójo pśipóznaśe jo młodym wuměłcam na jawišću z mócnym aplawsom pokazał.