Z Janšojc/Jänschwalde. Slědnu njeźelu jo se Cerkwinska droga pśed serbsko-nimskim domowniskim muzejom Janšojce se do rejowańskeje drogi pśetwóriła. Michael Apel jo zasej swój znaty a rad woglědowany kurs „Wjasele do rejki“ póbitował. Pla swójogo rejowańskego kursa pokazujo wšyknym zajmowanym wšake reje zdźěla k serbskej muzice.
Wjednica muzeja Nadine Adamowa jo to njeźelu wótpołdnja ze swójimi cesnoamtskimi pomocnikami organizěrowała. Wóna jo była spokojom z wótpołdnjom a groniła se smějucy „Droga jo jano pśeliš wuska, njedajo městno za wšyknych.“ Z wjedrom su woglědowarje teke gluku měli, jo było pitśku góruce, ale we chłodku lipow a pśi milnem wětšyku jo było wuźaržaś. „Wó špatnej wjedrowej warianśe njejsmy se mysli cynili, dokulaž njeby do muzejoweje brožnje teke wšykne pasowali. Ale w nuzy by se nam južo něco do mysli pśišło“, jo groniła Nadine Adamowa.