Z Wórjejc-Brětnje/Hoyerswerda-Bröthen. Wěra a woplěwanje rěcy słušatej w ewangelskich Serbach gromaźe. Woplěwanje stawiznow a wizije za pśichod słušaju gromaźe. To jo pokazało njeźelu, 18. junija 15. domowniski źeń ewangelskich Serbow we wórjejskem regionje. „Chtož na zachadnosć zabydnjo, njama pśichod“, jo pódšmarnuł Lothar Kujasch, pśedsedaŕ Serbskeje rejowańskeje a drastwoweje kupki Brětnja a wejsny zastojaŕ w Brětni-Michałkach. Z drugimi kśesćijanami jo wón zajtšo w Jańskej cerkwi nimsko-serbske namše swěśił. Chor Židźino pód nawjedowanim Kerstin Liederoweje jo pśewóźował muzikaliski ze spiwami „Dobre ranje“, „Laetare“, „Ow wola lubosće“, „Běži woda, běži“ a ze Smolerjowym drogowańskim žognowanim „Knjezowy jandźel“. Sigrun Nasdala a Bernd Bramborg ze jsy Nimcy stej zapšosby wopušćiłej. Wóni su byli za měr a zdźaržanje cerkwje, rowno tak zachowanje serbskego luda a dobru zgromadnosć z Nimcami ako teke skóry měr w Ukrainje. „Bog nas pśepšosyjo pśecej zasej na měr. Bóža gnada njeznajo žedne granice.