Z Lubina/Lübben. Comy dalej rozpšawiś wót II. Serbskego literarnego a muzikaliskego swěźenja „Wortschätze – Słowne drogostki – Słowne drohoćinki“, kótaryž jo se wótměł w Lubinje 24. junija.

Krotko pśed lěśojskimi prozninami jo stojał za wjele wuknicow a wuknikow wokrejsa Dubja-Błota wjerašk na programje: Na jawišću Lubinskego groda jo 60 wobźělnikow wuběźowanja „Sorben spinnen! Serby pśědu!“, kótarež za zachowanje serbskeje rěcy a kultury wokrejs Dubja-Błota wustaja, swóje pśinoski prezentěrowało. Wjele gósći jo do grodoweje zagrody pśijěło, aby źiśam pśi premjerje pśiglědowali. Finale wuknikojskego wuběźowanja jo se wótměł na Serbskem literarnem a muzikowem swěźenju města Lubina. Lubinski grod, grodowa zagroda a měsćańska biblioteka su se pśeměnili do wjelikego jawišća za serbsku literaturu a muziku.