Z Města/Cottbus. Nagromadu 15 wósobow jo se wobźěliło slědny stwórtk a pětk na źěłaŕnicce za pśiswójenje cuzych rěcow w Serbskem domje. Planował jo toś ten workshop wjednik rěcnego projekta Zorja Maksimilian Hasacki, a jo ku tej góźbje pśepšosył prof. dr. Dona Kiralya ako eksternego seminarnego wjednika. Don Kiraly jo rěcywědnik z Ameriki a se zaběra z didaktiku cuzych rěcow.

Na prědnem dnju jo prof. Kiraly wšake metody za wuknjenje cuzeje rěcy pśedstajił. Toś te techniki su wobźělniki – rozmjej docenty projekta Zorja a rěcneje šule – ze spańskeju rěcu wuproběrowali. Ako „domacny nadawk“ za pśiducy źeń kursa su dejali se pśemysliś, kak by mógli z teju metodu zachopjeńkarjam serbsku rěc wucyś.