Z Janšojc/Jänschwalde. Smy měli 9. junija skóńcnje zasej pó dłujkem casu wjeliki swěźeń za źiśi w našej źiśowni Lutki w Janšojcach. Trupa „Kunstreitertruppe Ompah Cottbus e.V.“ jo na toś tom dnju za naše źiśi grandioznu show z kónjami pód motom Indianarje pokazała. Wušej togo su se někotare pśechwatanki pśigótowali. Ku tej góźbje su wótkubłaŕki a wótkubłarje ze źiśimi barwojte wobwězki z pjeroweju pyšnotku wubaslili. Wótpołdnja su pśišli žedne pomocniki, aby zgromadnje wšake stojnice a móžnosći k sejźenju stajili, teren swětosnje wupyšnili a wšykno druge pśigótowali. Źiśi su mjaztym pjeršate za programom kśějkotali. Zeger 14:30 jo naš swěźeń z pśedstajenim Indianarjow wót „Ompahs“ startował. Wóni su nam mjazy drugim kumštne kuski na kónjach, wšake tradicije, ako góntwowanje a lasso-chyśenje pokazali a su prezentěrowali pyšne kostimy. Naše źiśi, starjejše, stare starjejše a druge wobglědarje su napněte pśi programje byli. Ned pó programje su se mógli źiśi a wšykne druge na aktiwitach, ako graśe, spiwanje a reje wót „Ompahs“ wobźěliś.