Z Města/Cottbus. Wjelgin rědny „Źeń serbskich pedagogowkow a pedagogow“ su wótkubłaŕki z tśich źiśownjow a dweju hortowu, ceptaŕki z wósym šulow a gósći z tśich institucijow dožywili, ako su dnja 8. junija pśepšosenjeju Rěcnego centruma WITAJ (RCW) slědowali. Źiśi WITAJ-źiśownje „Wila Kunterbunt“ Chóśebuz su z amizantnymi spiwami a z reju zarědowanje wótwórili. Wóni su dostali wjeliki aplaws a wót wjednika Chóśebuskego RCW Bernda Melchera strusk a dar. Pón jo wón informěrował wó aktualnosćach: na pśikład jo pśedwiźone, až dajo k źiśecemu casopisoju „Płomje“ digitalne pórucenja, až nowy Lutki-zešywk za źiśownje skóro wujźo z temu „wóda a ryby“ a, až jo nastał wobšyrny didaktiski material „Glědaj, co tam łazy!“ z informacijami za pedagogiski personal, graśami, gronkami a nadawkami za źiśi. Wušej togo jo powědał wó tuchylnych projektach: Tak jo lětosa 20. lěto, źož RCW pśewjeźo wuměłske wuběźowanje za źiśownje. Tema tenraz jo była „Pśi jatšownem wognju“ a su se wobźělili styri źiśownje ako teke wuknice a wukniki jadnogo horta. Wustajeńcu z wuměłskimi twóŕbami su za to natwarili.