Z Łužyce/Lausitz. Wót 6. do 9. julija wótmějo se we Łužycy južo k 14. razoju mjazynarodny folklorny festiwal „Łužyca“. Pśidu rejowaŕske a folklorne kupki a ansamble z cełego swěta, wóni budu zajmowanemu publikumoju wótměnjaty a pisany program póbitowaś. Pśi wuzwólenju wobźělnikow jo se na to źiwało, až su to zastupniki ludowych kupkow a mjeńšynow. Wósebnje maju se jich tradicije a nałogi pśedstajiś, kótarež stoje na UNESCO-lisćinje imaterielnego swětowego derbstwa. Witaś smějomy lětosa gósći ze Sri Lanki, Špańskeje (Mallorca), Rumuńskeje, Estniskeje, Serbiskeje, Słowakskeje a našeju susedneju krajowu, Pólskeje a Českeje. Se wě buźo teke serbska kultura pśedstajona.

Zachopk jo stwórtk, 6. julija ze swěźeńskim śěgom wšych wobźělnikow pó Budyšynje. Wjacor pśizamknjo se swětocne wótwórjenje na głownem jawišću Nimsko-Serbskego ludowego źiwadła.