Z Města/Cottbus. W tych styrich góźinach su woglědowarjam wobšyrny jawišćowy program póbitowali. Nejpjerwjej pak jo wušy šołta Tobias Schick ze zagroniteju za nastupnosći Serbow Anna Kosacojc-Kozeloweju 14. Serbski swěźeń wótwórił. Póstrowne słowa su wugronili Uta Henšelowa ako zastupujuca pśedsedaŕka Rady za nastupnosći Serbow, Sven Walter, direktor žarjabnice Sprewja-Nysa Chóśebuz-pódpołdnjo, kótaraž jo swěźeń pódpěrowała, ako teke wjednica regionalnego studija RBB Angelika Jordanowa. Na toś tom wótpołdnju stej wjadłej Diana Šejcowa a Gregor Kliem ako moderatora serbskego programa RBB dwójorěcnje pśez program. Liveband nAund jo se póstarała wó nowu serbsku popowu muziku z RBB programa. Mjazy pórucenjami jo wóstał cas se pśi stojnišćach rozgranjaś a wuměnjaś. Tak su stare znate pódla byli ako Heinzojc šlodaŕnja ze Žylowa, ale teke nowe woblica ako wuměłcowka Siggiko, z bergaŕskim mjenim Emily Bartholdojc, serbske kreslanki w manga/comic stilu wugótujo. Jeje starjejšej z USA stata Virginia stej teke pśijěłej a stej měłej stakim nejdlejšu drogu.