Z Dešna/Dissen. Cłonki tudskeje Domowinskeje kupki su se pónjeźele tyźeń wjacor zejšli na dwórje numer 26 pśi Depšćańskej droze. Wšykne su se woblakli źěłowu drastwu, su měli špachtle, chropnicu, grabje a chóžyšća w ruce. Tenraz kśě staru tapetu we dobrej śpě wu Twarcojc wótryś. „How comy napóraś tu centralu našogo projekta Zorja. Togodla wótnowijomy wšykne śpy. Ten dom jo słušał pjerwjej Annje Twarcowej. Wóna jo we casu pandemije zamrěła, jo była nejstarša Dešanaŕka. Wóna a jeje cłowjek stej słušałej k slědnym wejsanarjam we jsy, ako su kuždy źeń serbski powědali. How dej nastaś našo ‚rěcne gnězdo‘, a my se naźejamy, až Twarcojc serbski duch se hyšći chowa we tych murjach“, rozkładujo Maksimilian Hasacki, wjednik projekta. Prědny september dej se how intensiwna wucba serbskeje rěcy zachopiś. Rěcnej trenarće a jaden trenaŕ su k projektoju hyšći pśistupili. Dogromady 21 muskich a žeńskich su pšosbu wó pśiwześe do Zorjow stajili, ze 19 kandidatami jo dało rozgrona. Něnto jo rozsuźone, chto wót nich buźo we projekśe Zorja serbsku rěc wuknuś.