Z Rheinsberga/Reinsberg. Towaristwo za dolnonimšćinu w Bramborskej a Ostprignitz-Ruppiner Personenverkehrsgesellschaft stej za slědnu srjodu pšosyłej na jězbu z busom mjazy Rheinsbergom, Flecken Zechlinom (wobej Pódzajtšna Prignica) a Mirowom (Meklenburgska). W busach teje „linije grodowu“ maju něnto dwójorěcne pśipowěźenja zastanišćow w nimskej a dolnonimskej rěcy. Na monitorach w busu maju pśidatne informacije k a w dolnonimskej rěcy, na pśikład wokablowe lisćiny modernych techniskich słowow, mjenja rostlinow, kśesćijański moto, dolnonimske słowo lěta a dalšne. Powědała jo to Ute Eisenackowa, zastupna pśedsedaŕka towaristwa, faraŕka a ceptaŕka. Pśepšosenju su slědowali mjazy drugim turisty z regiona, zastupnik kulturnego ministaŕstwa Bramborskeje a cłonki dolnonimskeju towaristwowu Bramborskeje a Meklenburgskeje. W Meklenburgskej su rowno dolnonimske tyźenja. Turistiska linija 785 jo prědny konkretny kraja pśesegajucy dolnonimski projekt Bramborskego towaristwa.