Z Baršća/Forst. Wjele se pišo a wulicujo wó tej wjelikej strukturnej změnje (Strukturwandel) we Łužycy, w Dolnej, srjejźnej a Górnej. Wšake wót togo jo južo wiźeś, młoge projekty se hyšći pśigótuju a pśepytaju, lěc su wužytne dosć. Wokrejsny sejm Sprjewja-Nysa (SPN) jo togodla južo 2020 wobzamknuł, až muse se cłonki parlamenta na kuždem pósejźenju wó tom informěrowaś, kak z teju wěcku bula. To se teke cyni za wětšy źěl z pisnymi informacijami.
Na slědnem pósejźenju wokrejsnego sejma w maju w Baršću jo pak była k tomu wětša diskusija. K tomu běchu pśepšosyli wěcywustojnego luźa, ga Heika Jahna, kenž nawjedujo kupku „Wirtschaftsregion Lausitz“ (krotko WRL). Jeje głowny nadawk jo, zběraś, wobźěłaś a gódnośiś wše naraźenja a pšosby za wětše a mjeńše projekty, ako deje se financěrowaś z tych wjele, wjele milionow euro, ako Nimska a Bramborska cotej wudaś za nowe struktury we Łužycy. Te ga su notne, gaž buźo kóńc z wuglowymi jamami a elektraŕnjami, milinaŕnjami w Janšojcach, Hamorje a Carnej Plumpje.