Wót 1. do 3. septembra 2023 buźo we Wendlanźe w Nižosakskej pśiducy „Wendentag“. Towaristwo Wendischer Freundes- und Arbeitskreis z Lüchowa jo sebje kłobyk stajiło za cełkownu organizaciju. Na wótwórjeńskem wjacorku jo pśedwiźony pśednosk rěcywědnika pśi Słowjańskem instituśe akademije wědomnosćow Českeje republiki na Karlowej uniwersiśe w Praze, Vladislava Knolla, wó drjewjańskej rěcy. Za młogich Wendlandarjow buźo to pó wjele generacijach prědne zmakanje z rěcu prědownikow. Rěc Słowjanow ga jo how womjelknuła w drugej połojcy 18. stolěśa. Wjele stow lět su ju powědali w tśich narěcach wokoło Wustrowa, Dannenberga a Süthena. Bóžko njejo se žedna wuwijała na pisnu rěc kaž dolnoserbska na zakłaźe chóśebuskeje narěcy a górnoserbska pó budyšyńskem dialekśe. Móžno by to pó reformaciji było. Wó rěcnej situaciji wokoło lěta 1669 stoj w protokolu cerkwineje wizitacije w kulojcowej jsy Sateminje: „Die alten Leute, weil sie wendisch, verstehen nicht die deutsche Sprache, will geschweigen den Catechismum.