Z Města/Cottbus. Swětkownicu w nocy su chóśebuske bóže domy 20. raz wótwórili swóje źurja, aby se wósady pśedstajili, a to mjazy drugim ze wšakimi kulturnymi pórucenjami. Pěty raz su mógali woglědarje teke serbski program dožywiś, a to w Nimskej cerkwi. Tam jo było kazane na koncert z ansamblom „Resonantia“ z Lipska, kótaryž ma we swójom repertoire muziku renesance a baroka. Pśed tym jo Hartmut Leipner, pśedsedaŕ Spěchowańskego towaristwa za serbsku rěc w cerkwi, gósći w serbskej a nimskej rěcy wuwitał. Ansambel „Resonantia“ jo wustupił, a to pórědu. W Měsće stej se wjednik Frank Petersen a spiwaŕka Doreen Buschowa prezentěrowałej. Petersen jo grał na lawśe, teorbje (wósebna družyna lawty) a synthesizeru. Mjazy tymi pěś spiwami, wšykne w serbskej rěcy pśednjasone, su byli tśi kjarliže sławnego serbskego cerkwinego komponista Jana Krygarja. Naroźił jo se Krygaŕ pśed 425 lětami w Brjazynje pla Gubina. Póstarcenje, se zaběraś ze serbskeju cerkwineju muziku, jo dostał ansambel pśez Tilla Wojta, wón jo docent Instituta za sorabistiku.