Z Budyšyna/Bautzen. Ako prědne jo bramborske ministaŕstwo za wědomnosć, slěźenje a kulturu gratulěrowało Markoju Kowarjoju: Wón jo nowy pśedsedaŕ rady Załožby za serbski lud. Jogo su raźiśele z Bramborskeje a ze Sakskeje wuzwólowali na prědnem pósejźenju rady. Kowar jo naslědnik dłujkolětneje pśedsedaŕki załožboweje rady Susann Šenkec. Wóna njejo wěcej kandiděrowała. Ku wuslědkam jeje statkowanja słuša to pšawidłowne wótgłosowanje mjazy tymi wšakimi serbskimi gremijami, a teke to historiske pówušenje etata Załožby za serbski lud wó ceły běrtyl a teke to źiwanje na serbski lud we zwězkowej kazni, což jo w nimskej historiji jadnoraznje, a wušej togo to zmócnjenje strukturow w doněntejšnych brunicowych „rewěrach“. Wšykne nowe projekty k rewitalizaciji serbskeje rěcy a źěłowe městna, na pśikład za rěcnych motiwatorow, rozrostujuca na tom zakłaźe wót lěta 2020. „Insidery“ wěźe, až ta šykowna politiska diplomatija Susanny Šenkec jo za kulisami wjele k tomu pśipomogła, až ducenty milionow euro stoje k dispoziciji až do lěta 2038 za kopicu serbskich wjelikich projektow.