Z Bórkow/Burg. Domowinska župa Dolna Łužyca jo pód motom „pśijaśele – pismiki – prominentne“ literarne wuběźowanje w dolnoserbskej a nimskej rěcy za wše generacije wuwołała. Pśicyna za to su lětosne jubileje dolnoserbskich procowarjow: 130. narodny źeń redaktorki a basnikaŕki Miny Witkojc 28. maja, 170. narodny źeń basnikarja Mata Kosyka 18. junija a 150. narodny źeń redaktora a fararja Bogumiła Šwjele 5. septembra. Mimo wuběźowanja planujo župa hyšći zarědowanja k žywjenju a statkowanju tych jubilarow, kótarež su se zasajźali za serbsku kulturu, za zdźaržanje dolnoserbskeje rěcy a žywjeńskeje wašnje Serbow. Jich literariske a publicistiske statkowanje jo pśipomogało dolnoserbsku rěc až do źinsa wobchowaś a dalej wuwijaś.