Z Kórjenja/Kahren. Slědny stwórtk stej krajna cerkwja EKBO a zgórjelske biskupstwo pšosyłej do Kórjenja. Tam w „Centrumje za dialog a změnu“ su stwórty raz měli dialogowy źeń, a to pód titelom „Pytajśo to nejlěpše za Łužycu/Inowacije w cerkwi, góspodaŕstwje a towaristwach“. Patronat stej měłej zgórjelska generalna promštowka (how: Generalsuperintendentin) Theresa Rineckerow a zgórjelski katolski biskup Wolfgang Ipolt. To jo se zachopiło z impulsowyma pśednoskoma. We srjejźi jo stojało, až Łužyca jo tuchylu srjejź wjelikich změnow – a teke cerkwja stoj pśed transformaciju. Tśi workshopy su slědowali, to grono jo teke było wót cerkwje ako móžnego partnarja we strukturnej změnje. Dalšny workshop jo tematizěrował „tśeśe městna“ ako inowaciske sfery cerkwinego žywjenja, dodatnje k prědnym městnam (wósadam) a drugim městnam (na pśikład źiśownjam). Kriterije za spěchowane tśeśe městna mógu byś na pśikład kooperacija z njecerkwinskimi partnarjami. Njedejali se mysliś, až pśichod buźo na kuždy pad „cysto ewangelski“. Te wuglědy njejsu se wšyknym spódobali.