Z Města/Cottbus. Wót lěta 2008 dajo akciju „Stadtradeln“ w Nimskej. To jo wuběźowanje, źož luźe deje 21 dnjow dłujko tak wjele kólasowaś, ako móžno jo. Za to zapišu wobźělniki kilomejtarje, kótarež su wótjěli z kólasom. To lětosa trajo wót 7. až do 27. maja. Pśizjawiś móžo se kuždy, to teke jo hyšći móžno na slědnem dnju. Akciju dajo teke w Chóśebuzu. Chtož co pódla byś, daś źo na homepage www.stadtradeln.de/cottbus a se zapišo. Tam se pšaša za mjenim luźi, a teke, kakemu teamoju coju pśisłušaś. Pódla jo teke Dolnoserbski gymnazium, a kupka „Serbske kólasarje/kólasaŕki“. Te serbske kólasarje su se wobrośili na Casnik a pisali: „My smy załožyli kupku. Akcija wótběžyjo wót 7. do 27. maja a my by se wjaselili, gaby hyšći wěcej luźi našu kupku ze zběranim kilometrow pódpěrowali. Kupce se groni: Serbske kólasarje/kólasaŕki.“