Z Noweje Jsy/Neuendorf. Jo-lic w gatojskej gmejnje we wejsnem źělu Nowa Wjas pó Barbuckej droze jěźoš, wita wót srjejźi septembra pśed domom luštny z drjewa rězany mólaŕ. Wón pśepšosujo do nowo wugótowanego ateljeja z galeriju „Pśi Pódzajtšnem jazoru“ wuměłcowki Karin Heinoweje woglědaś. Dokulaž Nowa Wjas lažy pśi Chóśebuskem pódzajtšnem jazorje a wuměłcowka jo kśěła póśěg k regionoju a pśichodoju regiona natwariś, jo wóna mě swójogo wuměłskego doma pó tom pomjeniła: „Wjaselim se južo na motiwy, kótarež mě naš Pódzajtšny jazor hyšći k mólowanju pśinjaso.“ Karin Heinowa, roźona w Loitsche pla Magdeburga, jo wót pówołanja wótkubłaŕka a mysli wósebnje rada na cas w źiśowni w Drjejcach slědk. Tam jo pó pśeśěgu do Łužyce prědny raz teke ze serbskimi nałogami ako ptaškowa swajźba, zapust a kokot kontakt dostała a zagórjeta ze źiśimi toś te tradicije woplěwała. „Ja som pśecej južo rada mólowała, kśěła pśecej mólowaś a som měła žycenje, to pšawje nawuknuś. We 1980tych lětach som chórosći dla dłujko wupadnuła a som zachopiła w Rogeńskem parku bomy mólowaś.