Z Bórkow/Burg. W Bórkowach se pali. Z tudejšneje zakładneje a wušeje šule jo wujšeł list na medije, źož pór ceptarjow wopisujo radikalne pšawicaŕske tšojenja a to rozšyrjenje symbolow, pismow, muzikowych titelow, kótarež se měrje pśeśiwo wustawje, a teke namóc. Wóni su teke pisali, až tam jo „murja mjelcanja“ a až jim felujo pódpěra šulskego wjednistwa, šulskego amta a politiki, což nastupa to wójowanje strukturow, kótarež su winikojske napśeśiwo demokratiji. Wóni se toś žyce wěcej socialnych źěłaśerjow a wěcej projektow, kótarež spěchuju demokratiju. Direktorka teje šule Manuela Śichanowa tuchylu njepowěda wjele z medijami. Tyźenikoju „Die Zeit“ jo hyšći groniła, až jo wobtužona, dokulaž pisarje lista njejsu nejpjerwjej z njeju powědali, a až problemy njejsu tak masiwne, ako su wopisowane we tom lisće.