Z Lipska/Leipzig. Wót 27. do 30. apryla su byli knigłowe wiki w Lipsku. Wjele nakładnistwow jo měło swójo stojnišćo we tych wjelikich halach. Mjazy nimi jo było to serbske Ludowe nakładnistwo Domowina (LND). Tam su se gósći woglědali serbske a nimske publikacije a informacije wó Serbach. Luźe su mógali teke kupiś knigły. Wjelgin woblubowane su byli „Pyšpot procha“ Źilki (Jill-Francis Ketlicojc), a teke nimske edicije wót Krabata a wobrazowe zwězki. Sobotu jo Źilka na městnje ze swójich nowych knigłow cytała na Literarnem forumje w hali, pón jo wóna signěrowała kupcam swóje eksemplary.
Wótpołdnjo jo se LND pśedstajało na jawišću kampanje „So geht sächsisch“. Pód motom „Sorbisch dichten, aber ja! Junge sorbische Dichter starten durch“ jo se Syman Pětr Cyž, jadnaŕ LND, rozgranjał z basnikaŕku Žilku a z basnikarjom Jakubom Wowčerom. Wobej stej cytałej basni a stej wulicowałej wót swójich nazgónjenjow a zacuśow ze serbskeju rěcu a kulturu. Cil prezentacije jo teke był, pśisłucharjam pśibližyś rozdźěle a gromadnosći mjazy tym górno- a dolnoserbskim.