Z Lipska/Leipzig. Kóńc apryla jo swět awtorow, nakładnistwow a lubowarjow knigłow gromadu pśišeł na znate knigłowe wiki w Lipsku z „Manga-Con“ a swěźenjom „Leipzig liest“, kótaryž k tomu słuša. Te wiki ga njejsu se pśewjadli w lětach pandemije. Toś njejo pśechwatanje, až rekordowa licba woglědarjow jo pśichwatała, jich jo było 274.000 luźi. Nanejmjenjej tu sobotu (29. apryla) jo było śěžko wěriś, kaka mań luźi jo se waliła pśez tych pěś halow tych wikow. Wjele młodych luźi jo pśišło pśegótowane ako manga-póstawy, ceła hala jo była rezerwěrowana za pśedań produktow kołowokoło tych japańskich comicow. Jo, a aby pśišła slědk na licby: pśišło jo 2.082 wustajarjow a nakładnistwow z 40 krajow. Wěcej ako 3.200 luźi z cełego swěta jo sobu statkowało, 3.000 zarědowanjow jo było w ramiku wót „Leizpig liest“. Góstny kraj jo był Awstriska, literaturje a kulturje wót tam jo se wósebnje wjele wěnowało. Teke politikarje teje republiki we Alpach su pśišli, samo awstriski zwězkowy prezident Alexander Van der Bellen.