Z Chóśebuza/Cottbus. Wót 17. do 19. apryla 2023 jo se nimsko-serbsko-pólsko-ukrainska wuměna mjazy wuknicami a wuknikami Dolnoserbskego gymnaziuma Chóśebuz a 13. šulu Zielona Góra pó dłujkej pśestawce zasej wótměła. Projekt jo se głowje w Lubnjowje pód titelom „njeznate městna Dolneje Łužyce“ wótměł.

Gromaźe su prědny źeń do zwěrjeńca w Chóśebuzu woglědali, pótom su se z busom na pśebytk do Lubnjowa wudali. Wjacor su pó zgromadnej wjaceri stare serbske ludowe reje rejowali. Pśiduce zajtšo su wukniki a wuknice na Lědy drogowali a su do muzeuma pód gołym njebjom woglědali. Zasej slědk su speciality drugich ludow warili. Serby su mlince z jabłukoweju mucku a biteju zmjatanu warili a ukrainske wukniki a wuknice su „ukrainske pirogi“ pśigótowali.

Ned pó wobjeźe su cołnowali pó rědnych Błotach. Pótom su se zmakali pśi kursu „kórbikoweje liški“, pśi kótaremž su z witkow pleśone sudobja za ptaškowy futer nastali. Wjacor jo se spódobnje pśi wognišću z gitaru zakóńcył.