Z Wětošowa/Vetschau. 150 źiśi chójźi do horta móžnosćow, 30 wót nich su Witaj – źiśi z prědneje až do pěteje rědownje. Na gruntach horta jo se wutwórił Witaj – rum pód gołym njebjom, hejnak jadna rědowniska śpa we zelenem. Rum pód gołym njebjom se wěnujo serbskim powěsćam a jo wótwórjony za wše źiśi. Tam su nastali wšakorake elementy, šeru sćěnu su źiśi same pyšnje wumólowali a pokazujo pisane „Buźćo witane“. Paula Pietzerojc ze stwórteje rědownje jo powěsćowu sćěnu z wobrazami wudopołniła. Tak jo wóna tam namólowała pśezpołdnicu, błudnika, plona a hyšći dalšne figury we swójom stilu. „My smy se wósebnje koncentrowali na powěsći blišeje wokoliny, kótarež su wósebnje nastali w našom regionje wokoło Raduša“, groni wjednica horta Anke Gräfowa, k tomu jo se tam instalěrował (wutwarił) wót wuměłca za drjewo Svena Barnikela wužowy kral ako skulptura za balancěrowanje.