Z Bórkow/Burg. Bórkowy su znate dla kšasneje pśirody a póbitowanjow za turistow. Wót apryla jo wót teje gmejny dla dalšneje, mjenjej rědneje wěcy to grono w cełej Nimskej. Lěc to jo Bild, Süddeutsche Zeitung abo Tagesschau: Wšuźi pišu, na kaki part su wukniki Wušeje šule (k Zakładnej a wušej šuli „Mina Witkojc“) w Bórkowach pokazali swójo pšawicaŕske myslenje. To wšykno jo pśišło na swět, ako ceptarje teje šule su se z listom na zjawnosć šli, konkretnje na sćelak rbb. Ceptarje su teke wopisowali, až kolegium ceptarjow njeśěgnjo „za jadnym póstronkom“. Połojca ceptarjow lubjej wótwobrośijo wócy a njoco wiźeś, co se tšoj, jo to wumjatowanje. Designěrowany nowy ministaŕ za kubłanje w Bramborskej, Steffen Freiberg (SPD), jo gronił, až njejo pśechwatany. Wón jo pśilubił ceptarjam pódpěru, a slěźaŕka jo se pominała, až Konferenca kultusowych ministarjow (KMK) se wěnujo problematice pšawicaŕskego ekstremizma w pódzajtšnej Nimskej.