Z Picnja/Peitz. Pód napismom „Ludowědne mjenja rostlinow Dolneje Łužyce – wěda Serbow wó swěśe rostlinow a jich domownje“ jo kazała amtska biblioteka Picnjo dnja 21. apryla wjacor na wósebne zarědowanje nakładnistwa Pśiroda a tekst (Verlag Natur und Text) z Rangsdorfa. Serbski biolog, botanikaŕ a sobuawtor „Słownika dolnoserbskich zelowych, gribowych a lišawowych mjenjow“ Jens Martin jo pśijěł ako referent z Pódstupima. Knigłownja dolnołužyskego městaška Picnja, kótaraž wóswěśi lětosa stoty jubilej wobstaśa, jo była kradu njewěsta, lěc taka tematika zewšym dosć zajmcow pśiwabi. Ale z pśisamem 60 woglědarjami jo była pótom cytański zal nabite połny a pśetrjefiło wšykne wócakowanja. W běgu dweju góźinowu zarědowanja su pśisłucharje wóspjetnje teke póznali wšake dolnoserbske słowa, wobroty a sady.