Z Janšojc/Picnja/Jänschwalde/Peitz. Sobotu zachadnego kóńca tyźenja jo se drogowańska fotowa wustajeńca „Tracht + Landschaft/Drastwa + krajina“ w Serbsko-nimskem domowniskem muzeju Janšojce a njeźelu w picańskem muzeju huty a rybaŕstwa wótwóriła. Fotografije k tej temje su pśi Nimskem drastwowem swěźenju 2019 w Lubinje nastali a tam w radnicy wiźeś byli. Cełkownje sedym fotografow (Peter Becker z Raduša, Dr. Frank Knorr z gmejny Gatojce, Charles Koppehele z Jüterboga, Andreas Traube z Lubina, Eva Kowalewska z Durinskeje, Anna Felbermeirowa a Anton Hötzelsperger z Bayerskeje) jo se z temu zaběrało, ku kótaremuž dajo teke wobrazowy zwězk. Fotowa wustajeńca jo pó Lubinje mjazy drugim w Barlinju a Pódstupimje prezentěrowana była. Něnto su wuzwólowane wobraze až do kóńca lěta zasej we Łužycy a móžośo wustajeńcu „Tracht + Landschaft“ w muzejoma w Picnju a Janšojcach wiźeś. We tom až w Janšojcach tema drastwa dominěrujo, jo w Picnju tema krajina. How stej se dwa muzeja w Picańskem kraju namakałej, aby projekt zgromadnje realizěrowałej.