Z Města/Cottbus. Kóńc tyźenja pó jatšach jo njeglědajucy na špatne wjedro jadnab 700 woglědarjow (łoni wokoło 1.000) pśichwatało k Pisanemu dwórnišćoju, aby dožywili serbsku kulturu we wobłuku swěźenja k małym jatšam. Dolnoserbska kulturna akademija (DKA) jo wabiło 120 sobustatkujucych, kótarež su woglědarjam póbitowali cełu wjelerakosć serbskego žywjenja. To groni, wšake reje, pśi kótarychž su mógali gósći sobu cyniś, serbske spiwy, nałogi, rucnikaŕstwa, moda, literatura, wuměłstwo, źiwadło a wjele wěcej.

W hali dwórnišća jo Anna Zachariasojc dwójorěcnje program moderěrowała, na kótaremž su wustupowali chor „Łužyca“, Janšojski žeńskecy a muskecy chor a ako wósebnosć chor ukrainskeje gmejny. Za dobru lawnu jo se starał „Orchester generacijow“, kenž jo Michaela Apelta pśi „Wjasele do rejki“ muzikaliski pśewóźował. Wukniki Dolnoserbskego gymnaziuma njejsu jano pśed dwórnišćom mlince pśedawali, ale su tež modu designaŕki Sarah Gwiszcz pśedstajili. Źiśeca rejowańska kupka kulturneje akademije, kótaraž hyšći pyta za gólcami (wót 4 lět), jo publikum rozwjaseliła.