Z Budyšyna/Bautzen. Wědomnostny dorost ze zajmom za sorabistiku jo pšosony na zmakanje seśi młodych akademikarjow-sorabistow 30. junija a 1. julija w Budyšynje w Serbskem instituśe. We fokusu zmakanja stojtej interdisciplinarna wuměna a mjazsobne póznawanje slěźaŕkow a slěźarjow, kenž se ze Serbami zaběraju z regionalnego abo specifiski tematiskego wiźenja abo kenž take źěło planuju.

Wobźělnice a wobźělniki změju góźbu, aby swóje slěźenja pśedstajali a diskutěrowali. Witane su pśinoski ze wšakich wědomnostnych pśedmjatow, z rěcywědy, kulturnych wědomnosćow a stawiznow rowno tak ako z transdisciplinarnych pśedewześow z pśirownujucych mjeńšynowych slěźenjow abo z wobłuka digital humanities. Chtož co swój slěźaŕski projekt prezentěrowaś, daś zapódajo nacerjenje swójogo źěła, maksimalnje jaden bok A4. Teke krotki žywjenjoběg dej pódla byś, z informacijami wó wědomnostnem pśedmjaśe, městnje statkowanja a tuchylnem śěžyšću źěłabnosći.