Z Grodka/Spremberg. Slědnu njeźelu, 23. apryla 2023, su Grodkojska Domowinska kupka, Dolnoserbske kulturne towaristwo „Studnja“, Kśicowa wósada Grodk a Towaristwo k spěchowanju serbskeje rěcy w cerkwi na Serbske wótpołdnjo w tamnej Serbskej cerkwi pśepšosyli. Wěcej ako 40 gósći jo pśepšosenju na toś to zarědowanje slědowało. Wótběg programa jo se ale se změniło. Faraŕ Cyril Pjech jo z Barlinja ze śěgom do Chóśebuza pśijěł, a kśěł pótom z drugim śěgom dalej do Grodka. Dla togo pak, až njejo grodkojski śěg na śěg z Barlinja cakał, jo musała skóńcnje grodkojska faraŕka Henriette Försterowa swójogo kolega wót chóśebuskego dwórnišća z awtom wótholiś.