Ze Slěpego/Schleife. Łužyca móžo wordowaś pśikładna regiona za energiju, ako dajo se wobnowiś, groni wobswětowy zwisk. Jomu pśisłušaju wobswětowe towaristwa, klimowe kupki a lokalne iniciatiwy. Wóni wšykne gronje, až jěsne wótstupjenje wót wudobywanja brunice jo notne. To dejało se pó jich měnjenju jěsnjej staś, a nic akle w lěśe 2038. To wótstupjenje dejało se zmakaś z tym, což kněžaŕstwa su w lěśe 2015 wobzamknuli w Parisu dla šćity klimy. Togodla kśě demonstrěrowaś 7. maja pśi Wochožanskej jamje, a se zmakaś na tom dnju połdnjo pśi slěpjańskem dwórnišću. Pódla budu na pśikład Fridays for Future, Greenpeace, Campact, sakskojski „BUND“, Zelena liga w Chóśebuzu, iniciatiwa „Alle Dörfer bleiben“, Serbski sejm a dalšne.

Felix Ekardt, pśedsedaŕ togo BUND w Sakskej jo k tomu gronił: „Aby mógali dojśpiś ten cil, až klima na swěśe buźo se jano wogrěś wó 1,5 grad, muse wšykne energijowe wobłuki wordowaś njewótwisne wót wužywanja wugla, płuna a wóleja. To musy se malsnje staś. To pśiwóstśone wikowanje z emisijami tak a tak buźo zawinowaś wótstupjenje wót wužywanja brunice we běgu mało lět.“