Z Města/Cottbus. Dajo wjele rědnych źiśecych knigłow w dolnoserbskej rěcy. Młoge su znate pśełožone nimske bajki a tšojeńka, młoge su serbske awtory napisali. Ale chto su te źiśi, kenž raźi a derje cytaju tšojeńka, ako na pśikład „Kótare zwěrje jo nejmócnjejše“, abo za to se zajmuju, cogodla guslowaŕka „Anželinka ma wjelike starosći“? Wótegrono na to pšašanje jo dał Rěcny centrum WITAJ (RCW) zachadny pětk, a to w ramiku Cytańskego wuběźowanja, kótarež jo gromaźe ze Serbskim muzejom pěty raz pśewjadł. 12 źiśi wót drugego do stwórtego lětnika jo w klubowni rěcnego centruma w Chóśebuzu swóje nejžlubše bajki pśecytało. Wóni chójźe do Witaj-horta „Njewjerica“ w Žylowje, do Brjazyna, do horta „Lipa“ w Bórkowach a do „Horta móžnosćow“ we Wětošowje. Tamne wótkubłaŕki su źiśam wšake bajki a tšojeńka naraźili, a tak su se mógli sami tekst za pśedcytanje wuzwóliś.