Z Radworja/Radibor. We wudaśu górnoserbskego casnika „Serbske Nowiny“ slědny tyźeń pětk su cytaŕki a cytarje mógali něco wjelgin zajmnego cytaś z historije jatšownego rejtowanja. Ga to, což jo se rowno pśed 400 lětami tšojło we wjelikej a znatej serbskej jsy, w Radworju blisko Budyšyna. Tam su se k jatšam lěta 1623 muske dali do jatšownego rejtowanja, tak ako kužde lěto. Su wobrejtowali póla a wejsnu cerkwju. Ako pak su kśěli na kóńcu pó dobrej tradiciji rejtowaś pó kjarchobje, aby z tym cesćili zemrětych, njejsu to mógali. Kněžk Christoph von Minkwitz jo ga dał wrota na kjarchob zastajiś. Teke swójich słužabnych jo tam pósłał, aby tomu zadorali, až wobrejtuju kjarchob.