Ze Saarbrückena/Saarbrücken. Dr. Roland Marti jo se naroźił w lěśe 1953 w Genfje, w Šwicaŕskej. Wón jo studěrował słowjańsku, nimsku a orientalsku filologiju w Baselu a Moskwje. 1980 jo studije wobkóńcył z titlom „PhD“. 1986 jo slědowała habilitacija. Na to jo zachopił źěłaś na uniwersitach w Baselu a Bambergu, nježli jo 1989 pśewzeł profesuru na uniwersiśe w Posaarskej (Saarbrücken). Bóžko pak jo Nimska pó pśewrośenju wšake instituty za slawistiku reducěrowała a někotare samo wótstroniła, tak teke ten w Posaarskej. Pó wótwijanju instituta jo se Marti zaběrał z wucbu na honorarowej bazy a z wědomnostnymi projektami. Śěžyšćo pśi tom stej wordowałej dolnoserbšćina a Dolna Łužyca.