Z Města/Cottbus. Tury pśez Błota pěšy abo na cołnje, kafejownja z rejowanim, kafej a tykańc za seniory, zgótowanje produktow ze zelami – to su projekty, kenž wukniki Dolnoserbskego gymnaziuma su cynili w slědnych lětach ako wuknikojske firmy. Wuknikojska firma jo kurs seminara za matematiku a z tym jaden wót styri kursow seminara, kótarež su póbitowane wót jadnastego lětnika. Wót togo wukniki deje zběraś pjenjeze za dany lětnik, ale w srjejźišću stoje wósebnje wuwiśe znaśow za góspodaŕstwo, wabjenje a wótběgi firmy. Aby to jo kužde lěto zarucane, nowe cłonki wuknikojskeje firmy se wumysliju pśecej zas inowatiwne ideje, kótarež kśě zwopšawdniś gromaźe. W tom lěśe jo 11. lětnik wuzwólił projekt „Fabelingo“. Pśi tom organizěruju wótpołdnjo graśow z kafejom a tykańcom, bingo a graśami, źož wósebnje starše luźe su wutšobnje pśepšosone. Zarědowanje wótmějo se kuždu drugu srjodu wót zeger 15:00 až do zeger 17:00 w kafeteriji dolnoserbskego gymnaziuma. Zastup płaśi, z kusom tykańca a tasu kafeja, 6 euro.