Z Budyšyna/Bautzen. „Dorost wupominaś a spěchowaś słuša k bytostnym słupam filozofije Serbskego ludowego ansambla (SLA). Wótnowotki pśiběrajuca licba mjaztym tśeśego ‚ferialnego lěgwa z instrumentom‘ pokažo, až smy na dobrem puśu.“ Tak jo SLA-intendant Tomas Kreibich-Nawka zachadny pětk zespominał wósebny ferialny kurs za wuknice a wuknikow, na kótaremž jo 22 wobźělnikow z cełeje Łužyce nawuknuło šesć muzikowych twóŕbow, a to wót jatšownego pónjeźela do stwórtka w budyšyńskej młodowni. „Źinsa prezentěrujomy wuslědki. Dožywijośo jadnorazny koncert: aranžementy na zakłaźe serbskich folklornych a wuměłcowych spiwow z kompoziciskego pjera Christoph Reuthersa su ekstra wuźěłali za pśizjawjone instrumenty. Wóni źinsa w tej wersiji prědny a slědny raz zazniju.“, jo intendant pódšmarnuł.