Z Girona/Kiruna. Konflikty dla wudobywanja surowiznow a slědujucego znicenja krajinow su znate we wšakich krajinach, źož mjeńšyny su žywe. Jaden pśikład jo pódpołnocna Šwedojska. Te strony pśisłušaju „Sápmi“, tej samiskej zemi. Źož we pjerwjejšnych lětźasetkach su byli rozestajanja dla znicenja pastwow za sobow pśez wódowe milinaŕnje, su něnto jamy ten wjeliki problem. How ga deje nastaś wěcej jamow, wěcej wětšowych kólasow a snaź hyšći atomarne milinaŕnje. To pišo šwedojski casnik „Dagens Nyheter“. Za Håkana Jonsson, prezident šwedojskego samiskego parlamenta, njejsu to dobre powěsći, wón jo gronił tomu dnjownikoju, až maju dosć špatnych nazgónjenjow z wěcej jamami w pódpołnocnej Šwedojskej.

Tuchylu se naźeje górnikojske firmy a šwedojske kněžaŕstwo, až namakaju wěcej rudy, rědke zemje a druge wěcy we tej samiskej zemi. Pśez wogrětu klimu snaź buźo lažčej, tam „pśeryś“ tu zemju. W Gironje su źinsa te nejwětše zeleznico-rudowe (Eisenerz) jamy na swěśe. Wušej togo pódrubuju góle w Sápmi, aby to drjewo pśedali, a teke to se Samiskim kradu njespódoba.