Z Města/Cottbus. Serbski muzej na Młyńskej droze bu w Chóśebuzu w lěśe 1994 wótwórjony. W tych pśisamem 30 lětach su we njom mimo stawnych wustajeńcow wugótowali wokoło 110 wósebnych wustajeńcow, pśecej za tśi abo styri mjasece. Za wětšy źěl su we nich pśedstajili regionalnu serbsku historiju Dolneje Łužyce na wšakich pólach.
Něnt pak móžomy se w jadnej nowej wósebnej wustajeńcy wopóznawaś z casom, ako jo był wjelgin wažny za Serbow w cełej Łužycy, jo, samo za cełu Nimsku a Europu. „Lichota kiwa! Serby a mjeńšynowe pšašanje pó 1918/Die Freiheit winkt! Die Sorben und die Minderheitenfrage nach 1918“ - tak se groni tej wustajeńcy, ako jo se 31. měrca wótwóriła a až do 14. maja how buźo. Nic jano ta tematika, ale wósebna teke to, až wóna „drogujo“, jo něco kradu nowego. Dotychměst su ju pokazali 2022 w domje bramborskego parlamenta w Pódstupimje a w tśich městach w Českej – w Praze, w Českej Lipje a we Varnsdorfje. Pó swójom casu w Chóśebuzu buźo wóna dalej drogowaś – mjazy drugim teke do Pólskeje.