Z Turjeja/Tauer. Serbske mytose a powěsći su pla źiśi a dorosćonych jadnak woblubowane. Aby źiśam starstwoju wótpowědujucy pśistup k serbskim powěsćam zmóžnili, jo firma „Naturwelt Lieberoser Heide GmbH“ iniciěrowała, powěsćowe bajki we formje comic z pyšnymi ilustracijami wugótowaś. Prědny comicowy zešywk teje z wěcej źělow wobstojeceje serije se zaběra z tšojeńkami wódnego muža.

Ako prědna w cełem wokrejsu Sprjewja-Nysa jo źiśownja „Spatzennest“ w Turjeju dostała toś ten pyšny comicowy zešywk, a to srjodu, 29. měrca. W turjańskej źiśowni wužywaju dolnoserbske rěcne wucbne pórucenja. Źiśi wuknu tam serbske tradicije a nałogi - wósebnje pśez powěsći błudnika, plona abo wužowego krala ako źěl serbskeje kultury.

Olaf Lalk, zastupnik krajnego raźca, jo na tom dnju źiśam comicowe zešywki pśepódał. Zagronita za serbske nastupnosći we wokrejsu SPN Kerstin Kosakowa jo cytanje a pśedstajenje žednych wurězkow z comica pśigótowała.