Z Barbuka/Bärenbrück. Do šule jo Ursula Zonkowa, roźona Młynikojc (Müller), chójźiła w Barbuce. Źinsa jo w tom twarjenju kjarcma. Na faru jo pak chójźiła do Liškowa. Droga, pó kótarejž su do cerkwje gnali abo z kólasom jěli, źinsa wěc njejo, brunice dla. W Liškowje su byli ze 14 lětami górjejbrane pla fararja Gutzeit. Druge źiśi su byli z Tšawnice, Husa, Liškowa, abo Šlichowa. Tencas su byli wšykne źowća burske. Burscyc starka a Batramojc starka z Barbuka stej lapu wězałej.
Wujk Ursule Młynikojc jo był šlodaŕ. Wón jo šył burske kóšule a teke polki. To jo był Wylem Maro. Pla njogo jo wóna wótrosła. Ze wšych jsow su pśišli k njomu do Barbuka, aby jim wušył bursku drastwu. Jogo mašinu jo Ursula Młynikojc měła wjele lětźasetkow hyšći. Na njej jo pón wóna cańki lapam pśišywała. To jo wót wujka nawuknuła, a teke šorce ropkowaś.
Ale jo teke lan pśědła. To jo tak tencas było. Mama Ursule jo chójźiła ze staśiwami pó jsy a luźam tkała płat. Staśiwy jim do domu donjasć, to su jej musali pomagaś. Ale pón jo pór dnjow tam tkała. Płat su trjebali za płatowe šorce doma. A teke za płachtu do póstole, a za měchy.