Z Baršća/Forst. Tuchylu maju we wokrejsnem měsće Baršć dwa muzeuma. Ten jaden w měsće samem, w kótaremž jo pśedstajona tekstilna industrija a jeje dłujka historija. A ten drugi jo w nowem měsćańskem źělu – w Rogowje/Horno -, źož móžomy wiźeś, kak su se wuglowe jamy, wuglowa industrija w Dolnej Łužycy wuwili. Tej wustajeńcy, ako bu w lěśe 2006 wótwórjona, se groni „Archiw zgubjonych jsow“. Wóna co na to dopomnjeś, až buchu wót lěta 1924 pśisamem 140 jsow, wjaskow a sedlišćow wugla dla we Łužycy wótryte, wótbagrowane.
Wót oktobra lěta 2025 dejtej byś wobej muzeuma, wobej wustajeńcy, w jadnom twarjenju, a to wósrjejź města Baršć. Něntejšny Bramborski tekstilny muzeum ga dej se tak wutwariś a modernizěrowaś, až buźo w njom dosć městna za wobej doněntejšnej muzeuma. Wšykno to płaśi wušej 10 mio. euro, wětšy źěl teje sumy zapłaśijo Bramborska. Slědnu sobotu su za to rozny kamjeń sajźili. To buźo w pśiducyma lětoma nejwětše twaŕnišćo w Baršću.