Ze Zaspow/Saspow. Na slědnem pósejźenju měsćańskego parlamenta zachadny tyźeń jo se něco stało, což tych luźi w Zaspach rozgórijo, rozgniwajo. Źo ga wó tych wobydlari, ako bydle na Nowej droze. Něga jo ta słušała k Zaspam, pózdźej pak su ju pśibili nowemu měsćańskemu źěloju Nowy Chmjelow/Neu Schmellwitz. W Zaspach pak kśě, až wobydlarje na tej droze zasej słušaju k Zaspam, ako jo z lěta 1950 źěl města Chóśebuz. Wóni kśě, až wostanu Zaspy ako stare historiske serbske sedlišćo gromaźe. Za to se wósebnje teke zasajźujotej južo dłujki cas Hanzo Pšuskel, kenž jo teke cłonk měsćańskego parlamenta, a Bernd Kamenz, kenž se wjelgin zaběra z historiju swójeje jsy.