Z Chóśebuza/Cottbus. Wót lěta 1996 wuźělujo Załožba za serbski lud semesterske stipendije za źělny studij sorabistiki na Lipšćańskej uniwersiśe na studentach z pódzajtšnoeuropskego wukraja, doněnta južo 59 raz. Tuchylnej stipendiata Karolina Babczukojc, studentka slawistiki z Pólskeje, a Krystof Peršin, doktorand z Českeje, stej woglědałej slědny tyźeń do Łužyce, aby wšake serbske institucije bližej wopóznałej.

Stwórtk jo wjadła jeju drogu do Budyšyna. Gromaźe z Stanisławom Wowčerom, zagronitym za stipendiatow w załožbje, su byli gósći w Serbskem instituśe a w Rěcnem centrumje WITAJ. Pó rozgronje z direktorom załožby Janom Budarom a jogo zastupnicu Michaelu Mošoweju jo slědował woglěd pla Domowiny. Pó tom, až stej se teke nowe twarjenje Serbskego ludowego ansambla woglědałej, stej mógałej stipendiata k zakóńcenju dnja hyšći do Ludowego nakładnistwa Domowina a do Smolerec knigłownje póglědnuś.